№2 Мәртөк мектеп- гимназиясы
Описание: №2 Мәртөк мектеп-гимназиясының атауы өзі құрылғалы бірнеше рет өзгертілді. Әуелі ол бастауыш қазақ мектебі, кейіннен жетіжылдық қазақ-татар мектебі, қазақ орта және №2 Мәртөк ОМ, 2006 жылдан бері №2 Мәртөк мектеп-гимназиясы болып аталды. Ақтөбе облыстық атқару кеңесі президиумы отырысында 1933 жылдың 18 қазанында қаралған № 7837 хаттамасында қазақ мектеп- интернатын 1934 жылы салу туралы аудандық білім бөліміне және атқару комитетіне тапсырыс берілген. (1164-қоры, 1-кітап №110 іс қағазы 12.1933 ж.-3.03.1934 Орынбор обл. мұрағаты). 1935 ж. Мәртөк ауылында ең алғашқы қазақ бастауыш мектебі ашылды. Ауданның ауылдарынан 4-сыныпты бітірген оқушылар 5-сыныпты Мәртөктен оқуға мәжбүр болғандықтан, 1937 жылы мектеп жанынан интернат ашылды. Кейін орта мектеп болғанымен, оқушылардың орталау мектепті бітіріп, Ақтөбедегі 1 жылдық педагогикалық кластарға, т.б. оқу орындарына түсуіне, 1941-1945 жылдары Отан соғысы кезінде завод, фабрикаларға жұмысқа орналасуына байланысты оқушылар азайып, қайтадан жетіжылдық мектеп болып қалды. Соғыс жылдарынан кейін осы мектепте неміс, шешен, татар балалары да оқыды. 1947 жылдан бастап қайтадан жоғарғы кластарға оқушылар қабылдана бастады.
Уақыт өте келе ауылдық жерлерде орталау және орта мектептердің ашылуына байланысты оқушылардың саны жылдан- жылға азая бастады. 1975 жылы 62 оқушы, 1985 жылы 29 оқушы орта мектепті бітіру туралы аттестат алды. Ал 1991 жылы мектепте небәрі 100 оқушы оқыды. Бұл соғыстан бұрынғы оқушы санынан да едәуір аз еді. 1991 жылы республикамыз өзінің тәуелсіздігін алғаннан кейін қазақ ұлтының салт-дәстүрлері қайтадан жанданып, ұлттық рухымыз бен санамыз ояна бастады. Жоғарғы және орта арнаулы білім беретін оқу орындарында қабылдау емтихандары, барлық іс-шаралар екі тілде: қазақ және орыс тілдерінде жүргізілуіне байланысты ата-аналар балаларын қазақ мектебіне бере бастады. Тіпті кейбір ата-аналар баласын орыс мектебінен қазақ мектебіне ауыстырды. 1994 жылы екі 1- класс ашылды, осы жылы бала саны 200-ге жетті.