Намаздың 5 сүйіншісі:

1. «Шын мәнінде, намаз арсыздық пен жамандықтан тыяды». («Әнкабут» сүресі,Show more 45-аят).

2. «Күнделікті орындалған бес уақыт намаз, әрбір жұма намазына қатысу, Рамазан сайын ұсталған ораза, осы аралықтағы үлкен күнәдан басқа жасалған кіші күнәлардың бәрінің кешірілуіне себеп болады». (Муслим).

3. «Алладан қорқыңдар, бес уақыт намаздарыңды оқыңдар, (ораза ұстайтын) айларыңда ораза ұстаңдар, дүниелеріңнен зекет төлеңдер, басшыларыңа бойсұныңдар, сонда Раббыларыңның Жәннатына кіресіңдер» .(Тирмизи).

4. «Аллаға көп сәжде жаса. Өйткені сен Аллаға қандай бір сәжде жасасаң, міндетті түрде Алла ол арқылы дәрежеңді көтеріп, күнәңді кешіреді», «Пенде Раббысына ең жақын болатын (уақыт) – оның сәждедегі кезі. (Сондықтан онда) дұғаны көбейтіңдер» (Муслим).

5. «Құл намазға тұрған кезде оның күнәлары басына және иығына қойылады. Ол белін бүккенде және сәждеге барғанда күнәлары төгілетін болады». (Бәйхақи)

Бір күні түнде ел басқаратын халифа Омар (р.а.) мен Абдуррахман ибн Ауф Мәдина қаласының көшелерімен келе жатып бір үйден дабырлаған дауыстар естіді. Үйге таяп келген халифа:Show more
– Ей, Абдуррахман! Мынау кімнің үйі екенін білесің бе? – деп сұрады.
Абдуррахман:
– Білмеймін, – деп жауап берді.
Халифа өзі:
– Бұл – Рәбиға ибн Үмәйяның үйі. Іштегілер тегіс арақ ішкенге ұқсайды. Мастықпен айғайласып отыр. Бұларды мықтап тұрып жазаласақ қалай қарайсың?
Абдуррахман ибн Ауф болса:
– Маған салсаңыз, жазаға олар емес, біз лайықты секілдіміз! – деді именбестен.
Тосын жауапқа халифа іркіліп қалды. Сөйтті де:
– Неге? – деп сұрады артынша таңданысын жасыра алмай.
Сонда қасындағы саңлақ сахаба оның себебін былай деп түсіндірген еді:
– Өйткені Алла тағаланың «Адамдардың жасырын күнәларын іздестірмеңдер!» деген бұйрығы бар. Біз болсақ түннің бір уағында елдің үйіне келіп, тіміскіленіп, олардан қателік іздеп жүрміз. Негізі, жазаны біз тартуымыз керек!..

Абдуррахманның көкейге қонымды сөзіне ойланып қалған халифа оған:
– Ендеше, кеттік бұл жерден! Әйтпесе, расында да жазаны олар емес біз тартуымыз мүмкін, – деген еді асыға.

Былай шыға бере халифа өз-өзінен күбірлеп бара жатты. «Ойы да, жөні де түзу осындай достардан Аллаһ тағала бізді мақұрым етпегей! Менікі ғана дұрыс деп, кеудемсоқтыққа салынудан сақтасын! Білмегеніңді білгеннен сұрап, соның айтқанына көне білген қандай жақсы!»

Қасиетті айға құрмет!

Бір отқа табынушы бар еді. Сенімі басқа болса да, мұсылмандардыңShow more Рамазан айы мен ораза ұстауына ерекше құрметпен қарайтын.
Рамазан айы келген тағы бір жылы әдетінше мұсылмандар ораза ұстап, мешіттерде тарауих намаз оқып, құлшылықтарын жасай бастайды.

Осы уақытта әлгі отқа табынушы көшеден өз баласының бір нәрсе жеп кетіп бара жатқанын көреді. Бұған қатты ашуланып, баласын үйіне апарып, сазайын береді. «Мұсылмандардың қасиетті айын неге
құрметтемейсің? Олардың күндізгі уақыттарда ауыз бекітіп, ештеңе жемейтінін білмейсің бе? Әдейі мазақ еткендей көшеде тамақ жегенің не?!» – деп ұрсады.

Уақыты жеткенде әлгі мәжуси қайтыс болады. Кейіннен мұсылман әулие кісілердің бірі оны түсінде көреді. Бір ғажабы, ол Жұмақта жүр екен. Одан: «Сен отқа табынатын едің ғой. Жұмаққа қалай бардың?» – деп сұрайды. Сонда ол: «Иә, өзің білетіндей мен отқа табынатынмын. Бірақ өмір бойы мұсылмандардың қасиетті Рамазан айына, ұстаған оразаларына құрметпен қарап өттім. Қайтыс боларымда тосыннан «Әй, періштелерім! Рамазан айын құрметтегені үшін Мен бұл құлыма иман нәсіп етпекпін. Оның жанын мұсылман ретінде алыңдар, өзін мұсылмандар қатарына тізімдеңдер» деген дауыс естідім», – деп түсіндіреді.